Келгуси йилда Ўзбекистон Хитойдан 50 дан ортиқ замонавий агродронларни олиб келади. Бу ҳақда Президент Шавкат Мирзиёев қишлоқ хўжалиги соҳасидаги ходимлар билан учрашув чоғида маълум қилди.
Қайд этилишича, Қишлоқ хўжалиги вазирлиги ҳузурида ташкил этилган махсус дрон маркази мутахассис тайёрлаш, хизмат кўрсатиш ва техникаларни тўлиқ сервис билан таъминлаш имконини яратган. Жорий йилнинг ўзида 100 дан ортиқ дрон ёрдамида экинлар мониторинги ва илғор агротехник тадбирлар бажарилган.
Маълум қилинишича, келаси йилда ҳар бир вилоятда камида икки тадан дрон мобил комплекси ташкил этилади. Шунингдек, агродронлар учун рухсат этилган юк кўтариш оғирлиги 100 килограммдан 250 килограммгача оширилади.
“Қишлоқ хўжалигига рақамли технологиялар ва сунъий интеллект кириб келаётгани, кам харажат билан юқори ҳосил олаётган фермерлар сони ортаётгани мени хурсанд қилади”, — деди давлат раҳбари.
