“Der Spiegel”нинг ёзишича, Германия Мудофаа вазирлиги тасдиғига кўра, Бундесвер учун мўлжалланган ўқ-дориларни олиб кетаётган транспорт компанияси ҳайдовчиси юк машинасини Бура шаҳри яқинидаги қўриқланмайдиган автотураргоҳда қолдирган. У тунни меҳмонхонада ўтказишга қарор қилган ва транспорт бир неча соат давомида назоратсиз қолган.
Шу вақт ичида номаълум шахслар тахминан 10 минг дона пистолет ўқи, 9,9 минг дона автоматлар учун мўлжалланган бўш ўқ ва кўзни ачиштирувчи гранаталарни ўғирлаб кетишган.
Мудофаа вазирлиги ҳодисани “жиддий хавфсизлик бузилиши” сифатида баҳолаб, бундай ўқ-дорилар учинчи шахслар қўлига тушмаслиги кераклигини таъкидлаган. Бундесвердаги манбаларга кўра, ўғирлик “олдиндан режалаштирилган бўлиши эҳтимолдан холи эмас”.
Айни пайтда Германия ҳуқуқни муҳофаза қилувчи органлари томонидан кенг қамровли тергов олиб борилмоқда.
Эслатиб ўтамиз, аввалроқ Қирғизистонда ҳам қурол-яроғ савдоси билан шуғулланган уюшган гуруҳ қўлга олингани ҳақида хабар берилганди.
