Наманганнинг “Навбаҳор” клуби 44 ёшли Темур Кападзени жамоанинг янги бош мураббийси этиб тайинлади.
Клуб матбуот хизматига кўра, мутахассис раҳбарият билан келгуси мақсад ва режалар юзасидан тўлиқ келишувга эришган ва томонлар ўртасида шартнома имзоланган. Кападзе бугундан жамоа билан ишлашни бошлайди.
Маълумот учун, “Навбаҳор”ни 2025 йилги мавсумда Шерзод Жўраев бошқарган ва жамоа чемпионатни 40 очко билан 7-ўринда якунлаган.
Темур Кападзе мураббийлик фаолияти давомида Ўзбекистон олимпия жамоаси ҳамда “Олимпик” клубини бошқарган. 2025 йил бошида Сречко Катанец соғлигидаги муаммолар сабаб истеъфога чиққанидан кейин у миллий терма жамоага бош мураббий этиб тайинланганди.
Кападзе бош мураббий сифатида Ўзбекистонга тарихида илк бор жаҳон чемпионати йўлланмасини олиб берди.
Шундан сўнг ЎФА 2026 йилги мундиалга италиялик мутахассис Фабио Каннаваро билан чиқишни маъқул кўрган ва Кападзе жамоада ёрдамчи мураббий сифатида қолганди. Ноябр ойида у мустақил фаолиятга қайтиш ниятида терма жамоадан кетган.
Мутахассисга Индонезия терма жамоасидан жиддий қизиқиш бўлган ва бир неча бор музокаралар ўтказилганди. Бироқ Кападзе якунда Ўзбекистонда қолишни танлаб, “Навбаҳор” билан келишувга эришди.
