28 ноябрь куни “Ясний” шаҳри яқинида жойлашган стратегик ракета базасида кучли портлаш юз берди.
“Тhе Моscоw Тimes” ёзишича, гувоҳлар тасвирга олган видеода ракетанинг шахтадан кўтарилиб, ҳавода ёниб кетгани ва ерга қулаши, сўнг бинафша тусли улкан булут ҳосил бўлгани акс этган.
БМТнинг қуролсизланиш бўйича тадқиқотчиси Павел Подвиг портлаган ракета сатҳ жиҳатидан “Сармат” эканини билдирди. Россия ушбу ракетани 2013-йилдан бери ишлаб чиқмоқда, аммо у бир неча бор синовдан муваффақиятсиз ўтган. Ўтган йилги синовда ҳам ракета учирилган заҳоти портлаб, катта кратер ҳосил қилган эди.
Франция Стратегик тадқиқотлар жамғармаси эксперти Этьен Маркусга кўра, ҳарбийлар ракетани жорий йил якунига қадар сертификатлашга шошилмоқда, бироқ кетма-кет носозликлар бунга имкон бермаяпти. Бу сафарги синовда ракета шахтадан атиги 1 км узоқликда ерга қулагани айтилмоқда.
Баъзи экспертлар ракетанинг “Сармат” эмас, эски “Воевода” бўлиши мумкинлигини ҳам истисно қилмаяпти. Бироқ мутахассисларнинг аксарияти видеода кўринадиган “совуқ учириш” усули “Сармат”га хос эканини таъкидлаган.
Кузатувчилар фикрича, портлаш “Сармат” дастурининг навбатдаги ортга силжиши бўлиб, Президент Путиннинг ракетани 2025-йилда қўшин таркибига топшириш ҳақидаги ваъдаси реал бўлмаслиги мумкин.
