Рақобат қўмитасининг Хоразм вилояти ҳудудий бошқармаси тиббиёт муассасаларида пуллик хизматларни кўрсатиш тартиби юзасидан ўрганиш ўтказиб, бир қатор қонунбузилишларни аниқлади.
2023–2024 йиллар ва 2025 йил 1 июлигача бўлган даврни қамраган текширувлар давомида Янгибозор ва Гурлан туман тиббиёт бирлашмаларида асоссиз ҳақ олиш ҳолатлари қайд этилди.
Маълум бўлишича:
Янгибозор туман тиббиёт бирлашмаси 39 мингга яқин истеъмолчига 2 млрд сўмга яқин хизмат кўрсатган;
Гурлан туман тиббиёт бирлашмаси эса 120 мингга яқин беморга деярли 3 млрд сўмлик хизмат кўрсатган.
Ўрганишлар давомида хизмат нархларига қўшимча солиқлар қўшилгани, шунингдек, беморлар реал фойдаланмаган дори-дармон ва тиббий буюмлар нархлари ҳам умумий ҳисобга киритиб юборилгани аниқланди. Бу орқали 160 мингга яқин истеъмолчидан 230 миллион сўмдан ортиқ ортиқча маблағ ундирилган.
Ҳудудий бошқарманинг Махсус комиссияси томонидан икки туман тиббиёт бирлашмаларига нисбатан иш қўзғатилиб, уларга:
асоссиз ундирилган маблағларни истеъмолчиларга қайтариш;
келгусида қонун талабларига қатъий риоя қилиш бўйича мажбурий кўрсатмалар берилди.
