Криштиану Роналду ва Жоржина Родригеснинг кутилган тўйи Португалияда ўтади. “Jornal da Madeira”нинг ёзишича, маросим футболчининг туғилган шаҳри Фуншалда, 2026 йилги Жаҳон чемпионатидан кейин ёзда ташкил этилади.
Маълумотга кўра, никоҳ Фуншал католик черковининг марказий ибодатхонасида ўтказилиши, тантана эса шаҳардаги ҳашаматли меҳмонхоналардан бирида давом этиши режалаштирилган.
Аввалроқ Роналду август ойида узоқ йиллардан бери бирга бўлган севгилиси Жоржина Родригесга расман уйланиш таклифини берганини ижтимоий тармоқларда маълум қилган эди.
Роналду ва Жоржина 2016 йилдан бери бирга. Улар футболчи “Реал Мадрид” сафида ўйнаган даврда, Жоржина эса Мадриддаги Gucci дўконида ишлаган пайтда танишган. Жуфтлик 2017 йил бошида илк фарзандлари Алана Мартинага ота-она бўлганидан кейин муносабатларини оммага ошкор қилган.
Криштиану Роналду беш нафар фарзанднинг отаси ҳисобланади: Криштиану Жуниор (2010), Эву ва Матео (2017), Алана Мартина (2017) ва Белла Эсмеральда (2022).
Эслатиб ўтамиз, жуфтлик яқинда Саудия Арабистони валиаҳд шаҳзодасининг АҚШга ташрифи муносабати билан Оқ уйда бўлиб ўтган расмий кечки қабулда иштирок этган эди.
