Афғонистон энди кўмирни Покистонга эмас, Ўзбекистонга экспорт қилади. Бу ҳақда “Толибон” матбуот котиби Ҳожи Заид маълум қилди. Унинг айтишича, Тошкент билан бир қатор муҳим савдо келишувларига эришилган.
Заққа кўра, Ўзбекистон Афғонистонга сифатли цемент ва дори-дармон етказиб беради. Покистон билан чегара постларининг ёпилиши ва савдонинг тўхтаб қолиши Кобулни минтақадаги бошқа давлатлар, жумладан Эрон ва Ўзбекистон билан иқтисодий ҳамкорликни кенгайтиришга ундаган.
Бунгача “Толибон” афғон қишлоқ хўжалиги маҳсулотлари Ўзбекистон орқали ҳаво йўли билан Марказий Осиё, Жанубий Осиё ва Европа бозорларига чиқарилишини билдирганди. Шунингдек, муваққат ҳукумат тадбиркорларга савдо ва транзит учун янги йўналишлар топишни тавсия қилган.
“Толибон” молия вазирлиги Покистон билан савдо тўхташи “ҳеч қандай салбий таъсир кўрсатмаганини” таъкидлаган бўлса-да, ОАВ бу даъвони рад этмоқда. “Даwн” газетаси чегара ёпилиши икки давлат савдосига 4,5 миллиард доллар зарар келтирганини ёзди.
Иқтисодчи Реза Фарзом ҳам “Толибон”нинг баёнотини ҳақиқатга зид деб баҳолаб, Афғонистон савдо йўлларини зудлик билан алмаштира оладиган альтернатив маршрутларга эга эмаслигини қайд этди.
