Тошкент вилоятининг Ангрен шаҳрида 15 ёшли вояга етмаган қиз 4 нафар йигит томонидан зўрлангани ҳақида аввал хабар берилган эди. Болалар омбудсмани маълум қилишича, у ҳозирда Республика ихтисослаштирилган илмий-амалий тиббиёт марказида даволанмоқда ва руҳий ҳолатида ижобий ўзгаришлар кузатилмоқда.
Омбудсман қизнинг умумий соғлиги, руҳий ҳолати, ота-онаси ва оила аъзоларига нисбатан эмоционал муносабати ҳамда уларга бўлган ишонч даражасини ўрганиш мақсадида шифохонага борган. Суҳбат давомида вояга етмаган қиз қайси оила аъзоси билан яшашни исташи ҳақида ҳам ўз фикрини билдирган.
Хабарда таъкидланишича, шифокорларнинг масъулияти ва қизни парвариш қилишдаги меҳри туфайли унинг соғлиги яхшиланган, тана вазни ошиб, умумий аҳволи барқарорлашган.
Психолог хулосасига кўра, у билан олиб борилаётган мунтазам муолажалар натижасида қизда ижобий ўзгаришлар бор. Шу билан бирга, даволаниш тугагач, уни хавфсиз ва нейтрал муҳитга жойлаштириш мақсадга мувофиқлиги қайд этилган.
Маълумотга кўра, ушбу жиноят бўйича тергов якунланиб, иш судга юборилган. Қиз зўравонлик ҳолатидан кейин Тошкентдаги ихтисослаштирилган тиббий муассасага кўчирилган.
