Кўксарой қароргоҳида Ўзбекистон Президенти Шавкат Мирзиёев ва Туркманистон Президенти Сердар Бердимуҳамедовнинг тор доирадаги музокаралари бўлиб ўтди. Томонлар бу давлат ташрифини кейинги йилларда янада мустаҳкамланаётган дўстлик, яхши қўшничилик ва стратегик шериклик муносабатларини ривожлантиришда муҳим қадам сифатида баҳолади.
Учрашувда икки давлат ўртасидаги ижобий суръат мамнуният билан қайд этилди. Ҳукуматлараро комиссия, Ишбилармонлар кенгаши йиғилишлари ва маданий тадбирлар мунтазам ўтказилаётгани таъкидланди. Яқинда Урганч ва Тошкентда ўтказилган Туркманистон маданияти кунлари ҳамкорлик ривожида муҳим аҳамият касб этгани айтилди.
Ўтган йили икки давлат ўртасидаги товар айирбошлаш 1 миллиард доллардан ошиб, юк ташиш ҳажми ҳам ортиб боргани, хусусан, Туркманбоши портидан фойдаланиш фаоллашгани маълум қилинди.
Музокараларда ўзаро савдони кўпайтириш, саноат, энергетика, транспорт, машинасозлик, қишлоқ ва сув хўжалиги соҳаларида кооперацияни кучайтиришга алоҳида эътибор қаратилди.
Шунингдек, ҳудудлараро алмашинувларни кенгайтириш муҳимлиги таъкидланиб, Хива шаҳрида учинчи Ҳудудлар форумини ўтказишга келишиб олинди.
Томонлар минтақавий ва халқаро аҳамиятга молик масалалар бўйича ҳам фикр алмашдилар.
