Афғонистоннинг Ҳирот вилоятида аёлларга нисбатан янги чекловлар жорий этилди. Вилоят губернатори Зана Воҳид қарорига кўра, эндиликда аёллар паранжисиз ҳолда шифохоналарга, мактабларга ва ҳатто таксиларга ҳам киритилмайди, деб хабар берди Atlas Press.
Маълумотларга кўра, сўнгги кунларда паранжисиз аёллар вилоят шифохонаси, қамоқхона, таълим бошқармаси, банклар ва ФҲДЁ идораларига киритилмаётгани кузатилган. Гувоҳлар айтишича, ҳатто ҳижобдаги аёллар ҳам баъзан бинога киролмай, соатлаб кўчада кутишга мажбур бўлмоқда.
“Kabul Now” манбасининг ёзишича, “Толибон” ҳокимияти такси ҳайдовчиларига ҳам паранжисиз аёлларни олиб юрмаслик ҳақида кўрсатма берган. Бу буйруқни бузган ҳайдовчилар жазоланмоқда.
Эслатиб ўтамиз, ўтган йили “Толибон” Ҳиротдаги аёллар кафесини ҳам аниқ сабабсиз ёпиб қўйган, яқинда эса университет ходимларига иш вақтида смартфондан фойдаланишни тақиқлаган эди.
