Туркия ва Ўзбекистон ички ишлар вазирликлари ҳамкорлигида ўтказилган тезкор-қидирув тадбирлари давомида 10 нафардан ортиқ фуқароларнинг маблағларини ўзлаштирганликда гумон қилинган Зоҳиржонов Умид Дилшод ўғли (2005 й. т.) қўлга олиниб, Ўзбекистонга депортация қилинди.
Ички ишлар вазирлиги маълумотига кўра, у илгари бир қатор “киберфирибгарлик” жиноятларини содир этгани учун қидирувда бўлган.
Жабрланган фуқаролардан ИИВ ёки унинг ҳудудий бўлинмаларига, шунингдек, Ўзбекистоннинг Истанбул шаҳридаги Бош консулхонасига мурожаат қилиш сўралмоқда.
ИИВ таъкидлашича, хорижда яшириниб юрган жиноятчиларга нисбатан таъқиб давом эттирилади ва “жиноят учун жавобгарлик” тамойили қатъий таъминланади. Шу билан бирга, фуқаролар фирибгарларнинг тузоғига тушиб қолмасликка чақирилди.
