Ўзбекистонда аҳолининг жон бошига молиявий тушумлари энг юқори ва паст ҳудудлар эълон қилинди. Бу ҳақда Миллий статистика қўмитаси хабар қилди.
Қайд этилишича, 2025-йилнинг январь–сентябрь ҳолатига фуқароларнинг умумий даромадлари 825,3 триллион сўмни ташкил этди. Бу ўтган йилнинг мос даврига нисбатан инфляцияни ҳисобга олганда 8,4 фоизга кўпроқ.
Мазкур даврда фуқароларнинг жон бошига молиявий тушумлари 21,8 миллион сўмни ташкил этиб, номинал ўсиш суръати 116,1 фоиз, реал ўсиш суръати эса 106,3 фоиз даражасида қайд этилган.
Ҳудудлар кесимида жон бошига энг юқори даромадни 52 миллион сўм билан тошкентликлар кўрган. Ундан кейинги ўринларда фуқаролар 32,1 миллион сўмдан фойда қилган Навоий ва ҳар бир одам 26 миллион сўмлик молиявий тушумга эришган Бухоро турибди.
Қолган ҳудудлар қуйида келтирилган:
Хоразм вилояти — 22,8 млн сўм;
Тошкент вилояти — 21,9 млн сўм;
Андижон вилояти — 19,4 млн сўм;
Фарғона вилояти — 18,5 млн сўм;
Самарқанд вилояти — 18,1 млн сўм;
Сирдарё вилояти — 17,2 млн сўм;
Жиззах вилояти — 17,1 млн сўм;
Қашқадарё вилояти — 17 млн сўм;
Сурхондарё вилояти — 16,5 млн сўм;
Наманган вилояти — 15,8 млн сўм;
Қорақалпоғистон Республикаси — 14,8 млн сўм.
