АҚШ Президенти Доналд Трамп маъмурияти Вашингтон томонидан АҚШга наркотиклар олиб киришда айбланаётган Венесуэла раҳбари Николас Мадурага босимни кучайтиришни режалаштирмоқда. Хусусан, Оқ уй Венесуэладаги бир қатор нишонларга, жумладан, “наркокартеллар ва Мадуро режими таъсир доирасидаги объектларга” ҳаво ҳужумлари тайёрлаяпти. Бу ҳақда “Тhe Wall Street Journal” нашри хабар берди.
Манбаларга кўра, сўз Венесуэланинг ҳарбий-денгиз базалари ва учиш-қўниш йўлаклари жойлашган аэродромлар ҳақида кетмоқда, улар ноқонуний наркотрафикка алоқадор деб тахмин қилинмоқда. Нашр манбаларига кўра, Трамп бир ҳафта аввал Венесуэладаги ерусти нишонларига зарба бериш режасини эълон қилган бўлса-да, ҳали якуний қарорни қабул қилмаган, аммо ҳужум объектлари аллақачон аниқланган.
“Президент Трамп Мадурога аниқ огоҳлантириш берган – наркотиклар ва жиноятчиларни мамлакатимизга юборишни тўхтатинг. Президент наркотик оқимини тўхтатиш учун Америкада мавжуд барча ресурсларни ишга солишга тайёр”, дейди Оқ уй вакили Анна Келли.
WСЖънинг ёзишича, Венесуэла армияси замонавий ҳаво ҳужумидан мудофаа тизимларига эга, жумладан, Россияда ишлаб чиқарилган С-300 зенит-ракета комплексларининг тўртдан олтитагача нусхаси ва кўплаб кўчма зенит қуроллари мавжуд. Мутахассислар бу тизимлар АҚШ ҳарбий самолётларини аниқлаш ва уриб тушириш имконига эга эканини таъкидлайди. Нашрга кўра, АҚШ ҳарбий авиацияси сўнгги пайтларда Венесуэла чегаралари яқинида ҳаво мудофааси тизимларини хариталаш мақсадида парвозларни кучайтирган.
Ўтган ҳафта Мадуро мамлакатда Россияда ишлаб чиқарилган 5 мингга яқин “Игла-С” кўчма зенит ракета тизимлари мавжудлигини билдирган ва улар “ҳаво мудофааси учун муҳим позицияларда жойлаштирилганини” айтган. Парвозларни кузатиш хизматларига кўра, ўтган дам олиш кунлари Каракасга АҚШ санкциялари остидаги Россия ҳарбий самолёти борган.
Қайд этиш жоиз, жорий йилнинг сентябрь ойи бошидан бери АҚШ ҳарбийлари Кариб денгизида гиёҳванд моддалар ташиган деб гумон қилинган кемаларга бир неча бор зарба берган, оқибатда қарийб 40 киши ҳалок бўлган. Пентагон уларнинг баъзиларининг Венесуэла фуқаролари бўлганини тасдиқлаган. Ўтган ҳафта эса Трамп Кариб ҳавзасига зарба берувчи кемалар ҳамроҳлигида авиаташувчи кема гуруҳини юборган.
Эҳтимолий зарбалар арафасида Трамп маъмурияти Мадуро режимини АҚШни гиёҳванд моддалар билан тўлдиришга интилаётган наркотрафик ва террористик ташкилот раҳбари сифатида кўрсатиш кампаниясини бошлаб юборди. Венесуэла Президенти бу айбловларни рад этиб, АҚШ мамлакатнинг табиий бойликларини – нефть, газ ва олтинни эгалламоқчи эканини айтди. У, шунингдек, 15 минг аскарни сафарбар қилганини маълум қилди.
