АҚШ президенти Доналд Трамп мамлакатда Жанубий Корея учун ядровий сувости кемаси қурилишини маълум қилди. Бу ҳақда Associated Press хабар берди.
Сиёсатчи 29 октябрь куни Жанубий Корея президенти Ли Чже Мён билан учрашди. Музокаралар давомида Трамп кореялик ҳамкасбига ядровий сувости кемаси қуриш учун рухсат берди. Бунинг учун АҚШ ўз технологияларини баҳам кўришини таъкидлади.
“Бизнинг ҳарбий иттифоқимиз ҳеч қачон бугунгидай мустаҳкам бўлмаган. Шунга асосланиб, мен уларга ҳозирда мавжуд бўлган эскирган ва анча кам манёврли дизель сувости кемалари ўрнига ядровий сувости кемаси қуришга рухсат бердим”, — дейди Трамп.
Унинг сўзларига кўра, Жанубий Корея ўзининг ядровий сувости кемасини Филаделфиядаги кемақуриш корхоналарига буюртма қилади.
Ҳозирда ядровий двигателли сувости кемалари атига олтита давлатда мавжуд. Улар қаторига АҚШ, Россия, Буюк Британия, Франция, Хитой ва Ҳиндистон киради. Бошқа бир қатор мамлакатлар эса бундай кемаларни эндигина ишлаб чиқармоқда. Жумладан, Шимолий Корея ҳукумати ҳам шуни мақсад қилган.
Жанубий Корея АҚШга 350 миллиард доллар тўлайди
Трамп музокаралар давомида Жанубий Корея бож тўловлари камайтирилишига жавобан АҚШга 350 миллиард доллар тўлашга рози бўлганини айтди. АҚШ президенти импорт божларини апрель ойида эълон қилган бўлиб, дастлаб Жанубий Корея учун бу божлар 25 фоизни ташкил этган. Ўшанда Сеул Вашингтон олдидаги “тарихий қарздорлик” сабабли АҚШ божларига жавоб чораларини кўрмаслигини билдирган эди.
“Улар бизнинг нефть ва газимизни катта миқдорда сотиб олишга рози бўлди. Жанубий Кореянинг бой компаниялари ва ишбилармонлари томонидан мамлакатимизга киритиладиган инвестициялар эса 600 миллиард доллардан ошади”, деди Трамп 29 октябрь кунги учрашувда.
