АҚШ ва Жанубий Корея божхона божлари бўйича келишувга эришди. Бу ҳақда бугун, 29 окятбр куни АҚШ Президенти Доналд Трамп мамлакатга ташрифи чоғида маълум қилди.
“Биз келишувга эришдик”,— дейди Америка Президенти.
Трампнинг сўзларига кўра, Жанубий Корея вакиллари билан учрашувда “кўплаб қарорлар қабул қилинган”.
“Божхона божлари бўйича келишув якуний босқичга яқинлашмоқда, шунингдек, биз миллий хавфсизликнинг муҳим масалаларини ҳам муҳокама қилдик. Айрим жуда муҳим бандлар бўйича келишувга эришдик”, — дейди республикачи.
Трамп ташриф давомида мамлакат Президенти Ли Чже Мён билан Кёнжу Миллий музейида тушлик қилган ва олий даражадаги учрашув ўтказган. Маълумотларга кўра, саммит деярли бир ярим соат давом этган.
Маълумот учун, жорий йилнинг июль ойи бошида Трамп АҚШ 1 августдан бошлаб Япониядан ва Жанубий Кореядан АҚШ бозорига олиб кириладиган барча товарларга 25 фоизлик ягона импорт божи жорий этишини эълон қилган эди. Республика партиясидан сайланган Президентнинг айтишича, Япония ва Жанубий Корея билан доимий савдо номутаносиблиги “АҚШ иқтисодиёти ва миллий хавфсизлигига таҳдид солмоқда”.
31 июль куни эса АҚШ раҳбари Жанубий Корея билан савдо келишувига эришилганини ва бу мамлакат учун божхона ставкаси 15 фоизни ташкил этишини маълум қилди. Трампнинг айтишича, Сеул Вашингтонга “АҚШга тегишли ва Президент сифатида шахсан унинг томонидан танланган инвестициялар учун” 350 миллиард доллар ажратади. Бундан ташқари, Жанубий Корея Қўшма Штатлардан 100 миллиард долларлик суюлтирилган табиий газ ва бошқа энергия ресурсларини харид қилади.
