Шавкат Мирзиёев 20-октябр куни Ислом цивилизацияси марказига ташриф буюриб, бу ердаги экспозициялар орқали ўзбек халқининг бой тарихий ва маънавий меросини кенг намойиш этишга қаратилган ишлар билан танишди.
Мазкур лойиҳа давлат раҳбарининг 2017-йил 23-июндаги қарорига асосан бошланган. Кўп ўтмай, 2018-йилги Рамазон ҳайити куни унинг пойдеворига тамал тоши қўйилган. Ўтган даврда бу ерда катта ҳажмдаги қурилиш ва ободонлаштириш ишлари амалга оширилди.
Марказ қадимий меъморий анъаналар ва миллий безаклар уйғунлигида қурилди. Иншоотнинг тўрт томонида баландлиги 34 метрли пештоқлар, ўртада эса 65 метрли миллий услубдаги гумбаз қад ростлаган.
Иншоотнинг марказий қисмида Қуръони карим зали жойлашган. Бу ерда мусулмон оламининг ноёб маънавий дурдонаси саналган қадимий Усмон Мусъҳафи намойиш этилади. Шунингдек, сомонийлар, қорахонийлар, хоразмшоҳлар, темурийлар ва бошқа сулолалар даврига оид муқаддас китоб нусхалари, уларнинг эски ўзбек тилидаги таржималари, шу билан бирга, жаҳондаги энг нодир қўлёзма Қуръонлардан намуналар ҳам жой олади.
