Наманган вилоятининг Норин туманидаги “Шўрариқ” маҳалласини “Янги Наманган” маҳалласига айлантириш жараёнига киришилди ва туман ҳокими шу маҳалла ҳудудига ўрнатилган контейнер уйга кўчиб ўтди. Бу ҳақда вилоят ҳокимлиги матбуот хизмати хабар берди.
Билдирилишича, Президент 16 сентябрь куни Норин туманидаги “Шўрариқ” маҳалласига ташрифи чоғида маҳалла идорасида бўлиб, инфратузилма ҳолатини танқид қилганди.
“Туман ҳокими келиб мана шу ерда ётади. Ҳамма Наманганнинг атрофида юрибди. Бу ердаги одамлар одам эмасми? 3000 та иш жойи қилсак бўлади”, — деган эди давлат раҳбари.
Маҳаллада шароитни яхшилаш бўйича вилоят ҳокимига топшириқ берганди. Шунингдек, маҳалла номи “Шўрариқ”дан “Янги Наманган” маҳалласига ўзгаришини айтганди.
“Мана сизларнинг маҳаллаларингиз қўштирноқ ичида жуда ривожланган бўлиб кетган экан. Мана маҳалла раисининг биносини кўрдим, жойини кўрдим. Шунинг учун бугундан бошлаб маҳалла ўзгаради, маҳалланинг атрофи ҳам ўзгаради, номини ҳам ўзгартиряпман”, деган эди давлат раҳбари маҳалла аҳли орасига кириб борганида.
Вилоят ҳокимлиги матбуот хизматининг маълум қилишича, ҳокими Шавкат Абдураззоқов бошчилигида тегишли ўринбосарлар ва мутасаддилар иштирокида президент томонидан белгиланган вазифалар ижросини таъминлаш мақсадида Норин туманидаги “Шўрариқ” маҳалласини “Янги Наманган” маҳалласига айлантириш жараёнига киришилди.
Маҳалла аҳли билан учрашувда маҳалла қиёфасини тубдан ўзгартириш, бўш турган эски бинолар ўрнида саноат зонаси ташкил этиш, инфратузилмани ривожлантириш бўйича режалаштирилган ишлар ҳақида ахборот берилди. Шунингдек, “Янги Наманган” ва унинг атрофидаги 6 та маҳаллани жадал ривожлантириш бўйича мастер режа ишлаб чиқиш юзасидан мутахассислар, аҳоли вакилларининг таклифлари тингланди.
Шу ерда барча ишларни мувофиқлаштириш бўйича вилоят штаби ташкил этилди. Ислоҳотларни тезлатиш, мавжуд муаммоларни жойида бартараф этиш, маҳаллани обод масканга айлантириш учун Норин тумани ҳокими шу маҳалла ҳудудига ўрнатилган контейнер уйга кўчиб ўтди.
2021 йилнинг февралида Наманган вилояти ҳокими Шавкат Абдуразоқов президент ташриф буюрган “Бунёдкор” маҳалласида муаммолар ўз ечимини топгунига қадар шу ердаги контейнер уйда яшаган эди.
