Афғонистондаги “Толибон” муваққат ҳукумати сўнгги 24 соат ичида олтита вилоят аҳолисининг интернетдан фойдаланишини чеклаб қўйди. Бу ҳақда “Аму тв” хабар берди.
Маълум қилинишича, Балх, Қандаҳор, Ҳилманд, Ҳирот, Урузгон ва Нимрознинг аҳолиси интернетдан маҳрум қилинган ва “Афган telecom” давлат компанияси томонидан кўрсатиладиган оптик толали хизматлар тўхтатилган.
Чекловлар аҳоли ўртасида хавотир уйғотган, уларнинг таъкидлашича, Қобулдаги интернет хизмат кўрсатувчи компания вакиллари оптик толали интернет тахминан 20 кун олдин тўхтатилганини айтган.
Такидланишича, “Толибон” муваққат ҳукуматининг Балхдаги матбуот котиби тақиқ тўғридан-тўғри “Толибон” олий раҳбари Ҳайбатуллоҳ Охундзода томонидан берилганлигини айтиб, бу чора ахлоқсиз хатти-ҳаракатларнинг олдини олиш мақсадида кўрилганини билдирган ва расмий эҳтиёжлар учун муқобил ички тармоқ яратилишини таъкидлаган.
