Ўзбекистонда болаларни жинсий зўравонлик ва порнографиядан ҳимоя қилиш бўйича қонунчилик кучайтирилмоқда.
Олий Мажлис Сенатининг ялпи мажлисида муҳокама этилаётган қонун лойиҳаси болалар тасвири туширилган порнографик маҳсулотни сақлаганлик учун жавобгарлик жорий этиш, интернет орқали жинсий зўравонликка қарши аниқ нормалар белгилаш ва жазо чораларини кучайтиришни назарда тутади.
Қонунга кўра, вояга етмаганларни сўроқ қилиш давомийлиги аниқ белгиланади — энди бир кун ичида сўроқни якунлаш талаб қилинади. Бу болаларни ортиқча психологик босимдан ҳимоя қилишга хизмат қилади.
Қонун лойиҳаси муҳокамасига сиёсий партиялар, мутахассислар ва Бола ҳуқуқлари бўйича вакил ҳам жалб этилган. Қатор нормалар таҳрирдан чиқарилди ва лойиҳа юридик талабларга мувофиқ равишда такомиллаштирилди.
