Кеча, 10 сентябрь куни Афғонистоннинг Ғор вилоятида “Толибон” муваққат ҳукуматининг кончилик ва нефть вазири Ҳидоятуллоҳ Бадрий ҳамда вилоят ҳокими Ҳаётуллоҳ Муборак бўлган вертолёт қулаб тушди. Бу ҳақда “Пажҳwок” хабар берди.
Маълум қилинишича, ҳодиса Тулак туманининг Налбондон ҳудудида юз берган. Ҳалокат оқибатида йўловчилар зарар кўрмаган. Ҳоким матбуот котиби буни техник носозлик билан изоҳласа, Мудофаа вазирлиги эса вертолёт тоғ билан тўқнашганини билдирган.
“Бугун тушдан кейин бир қатор расмийларни олиб кетаётган ҳаво кучларига тегишли вертолёт Гор вилоятидан Тулак туманига парвоз қилган эди. Вертолёт кўтарилиш вақтида баъзи техник муаммолар сабаб тоғ билан тўқнашиб, қулаб тушган”, — деб ёзган мудофаа вазирлиги матбуот котиби.
Маълум қилинишича, амалдорлар тумандаги қўрғошин конини кўздан кечириш учун йўл олган бўлган.
