Ҳиндистонлик таниқли миллатчи ташкилоти раҳбари Моҳан Бҳагват оилаларни камида 3 нафар фарзанд кўришга чақирмоқда. Бу ҳақда Reuters хабар берди.
Маълум қилинишича, БМТ маълумотларига кўра, Ҳиндистон аҳолиси ҳозирда 1,46 миллиард бўлишига қарамай, мамлакатда аёллар ўртача 2 нафар фарзандли бўлмоқда. Бҳагват аҳолининг “назорат остида, лекин етарли миқдорда бўлиши” лозимлигини айтиб, миллий манфаат учун ҳар бир оилада 3 нафар фарзанд бўлиши кераклигини таъкидлаган.
Унинг чақириғи миллатчи етакчилар ва сиёсатчилар орасида демографик барқарорлик ва маданий идентификация ҳақидаги ташвишни акс эттиради. Билдирилишича, ҳинд аҳолиси орасида туғилиш пасаяётган бўлса, Ҳиндистоннинг мусулмон аҳолиси сони ўсиб бормоқда.
РСС — ҳинд маданиятини тарғиб қилувчи ташкилот бўлиб, кўплаб сиёсатчилар, жумладан, бош вазир Нарендра Моди унга аъзо ҳисобланади. Таҳлилчилар Модининг BJP (Бҳаратия Жаната) партияси сиёсати кўпинча РСС позицияларига мос келишини таъкидлайди.
Бҳагват РСС Ҳиндистон аҳолисининг тахминан 14 фоизини ташкил этувчи мусулмонларга қарши экани ҳақидаги танқидни рад этиб шундай деди:
“Бизнинг аждодларимиз ва маданиятимиз бир, диндаги фарқ идентификацияни ўзгартирмайди. Ўзаро ишонч ҳар томонлама муҳим. Мусулмонларнинг дини бошқалар билан қўлни қўлга берганда хавф остида қолмайди. Улар бу қўрқувдан халос бўлиши керак”.
