Дания бош вазири Метте Фредериксен бу воқеа учун расмий узр сўраб, “аёллар адолатсиз муносабат ва тизимли дискриминацияга учради, бу гренланд жамияти учун ҳануз очиқ яра бўлиб қолмоқда”, деди. У билан бирга Гренландия ҳукумати раҳбари ҳам узр билдирди.
Маълумотларга кўра, 1960–1970 йилларда Копенҳаген аҳолининг тез ўсишини олдини олиш мақсадида ёш қизларга розилигисиз спираль ўрнатишни тарғиб қилган. Натижада кўплаб аёллар бепуштликка учраган, руҳий изтироб чеккан.
Бу “спираль можароси” кенг жамоатчиликка фақат 2022 йилда Дания радиоси тергови орқали маълум бўлди. Бугунга келиб, 143 жабрланувчи коллектив даъво аризаси билан судга мурожаат қилган ва 6 миллион доллардан ортиқ компенсация талаб қилмоқда.
Дания ва Гренландия ҳукуматлари воқеани ўрганиш бўйича қўшма тергов олиб бормоқда. Якуний ҳисобот сентябрь ойида эълон қилиниши кутилмоқда.
