Ҳолат 2025 йил 2 август куни содир бўлган. Андижон вилояти Хўжаобод туманида яшовчи 2007 йилда туғилган 2 нафар бола Наманган вилоятига кетиш мақсадида Самарқанд шаҳридан йўловчи сифатида фуқаро А.Н. бошқарувидаги Cobalt машинасига минишган. Сирдарё вилояти ҳудудида ҳайдовчи ҳожатхонага кириб кетганида улар машинани олиб қочишган.
Тўсиб ушлаш режаси ҳаракатга келтирилгач, уларни Бўка тумани ҳудудида ИИБ ходими тўхтатишга уринган. Аммо улар ходимни пичоқлаб, Cобалтъни қолдирган ҳолда унинг Matiz машинасини ҳайдаб кетишган.
Вилоят ҳудудидаги барча ЙПХ инспекторлари, ЙПХ масканлари ва блок-постлар огоҳлантирилиб, мавжуд камералардан олиб қочилган машинанинг ҳаракат йўналишини аниқлаш бўйича ишлар олиб борилган.
Шундан сўнг, гумонланувчилар Тошкент вилояти Оҳангарон туманида ҳаракатланиб кетаётганида уларга ЙПХ инспектори Х.Д. тўхташ ишорасини берган. Бироқ улар инспекторнинг бу талабига бўйсунмай, уни машинада уриб юбориб, йўлда давом этишган. Инспектор эса оёғидан жароҳатланиб, шифохонага мурожаат қилган.
Олиб борилган тезкор-қидирув ишлари натижасида гумонланувчи шахслар Оҳангарон шаҳри ҳудудида ушланган.
