Ижтимоий тармоқларда Андижон шаҳрида 17 ёшли кийим дўкони сотувчиси "насияга" кўйлак бермагани учун бир гуруҳ ўсмир йигитлар томонидан калтаклангани ҳақида хабарлар тарқалди. Ушбу ҳолат юзасидан Андижон вилояти Ички ишлар бошқармаси муносабат билдирди.
Маълум қилинишича, жорий йилнинг 30 июль куни соат 13:50 ларда 2009 йилда туғилган Н.И. ва 2010 йилда туғилган П.М. Андижон шаҳри “Навбаҳор” маҳалласи Машраб кўчасида жойлашган “Куйов сарпо” номли кийим дўконида сотувчи бўлиб ишловчи фуқаро 2008 йилда туғилган М.Қ.нинг олдига борган. Улар сотувчидан "насияга" иккита кўйлак олиб чиқиб беришини сўраган. Шу вақтда йигитлар ўзаро гап тортишиб кетган ва оқибатда Н.И. ва П.М. М.Қ.ни ҳақорат қилиб, уни урган.
М.Қ.га нисбатан шу куннинг ўзида белгиланган тартибда суд-тиббий экспертизаси тайинланган. Ҳозирда ушбу ҳолат юзасидан Андижон шаҳри бўйича ИИО ФМБ томонидан терговга қадар текширув ҳаракатлари олиб борилмоқда.
