“Uzbekistan Airways” авиакомпаниясининг 28 июль, кечаси Истанбулдан Тошкентга учган “HY272” рейси парвоз вақтида босим беқарорлиги сабабли Истанбул аэропортига қайтишга мажбур бўлди. Бу ҳақда компания матбуот хизмати раҳбари Darakchi.uz’га маълум қилди.
Билдирилишича, борт рақами “UK67003” бўлган самолёт Истанбулдан ҳавога кўтарилганидан ярим соат ўтиб, 350-эшелон баландлигида салон ва кабинадаги босимда муаммо кузатилди. Сигнализация тизими ишга тушганидан сўнг, экипаж хавфсизликни таъминлаш мақсадида учиш аэропортига қайтишга қарор қилган.
Самолёт маҳаллий вақт билан 15:50да Истанбул аэропортига муваффақиятли қўнди. Авиакомпаниянинг техник хизматлари муаммони бартараф этиш учун зарур чораларни кўрган.
Кутиш вақтида йўловчилар овқат ва сув билан таъминланди, улар учун меҳмонхона ажратилди. Бугун, 29 июль куни йўловчилар “HY8272” захира рейси орқали Тошкентга учирилди. Парвоз маҳаллий вақт билан соат 14:48да якунланган.
“Uzbekistan Airways” юзага келган ноқулайликлар учун узр сўраб, йўловчиларнинг хавфсизлиги энг устувор вазифа эканини таъкидлади.
