АҚШ президенти Дональд Трамп BRICS гуруҳи устидан “ғалаба қозонганини” эълон қилди. У ўзининг қаттиқ бож сиёсати туфайли Владимир Путин ва Си Сзинпин BRICS саммитига келмаганини айтиб, бу ҳолатни ўзининг ташқи иқтисодий ғалабаси сифатида кўрсатди.
Трамп ўзига хос оҳангда шундай деди: “Ҳеч кимга биз билан ўйнашга йўл бермаслигимиз керак. BRICS деган гуруҳ – асосан олти давлатдан иборат кичик бир уюшма. Мен уларга кучли зарба бердим. Улар доллар ва АҚШ ҳукмронлигига қарши чиқмоқчи эдилар. Мен 10 фоизлик бож жорий қиламан, деб айтгандим. Эртаси куни улар йиғилишга бормади. Жуда ғалати, тўғрими?”
Унинг фикрича, бож тўловлари BRICS давлатларига иқтисодий босим бўлиб хизмат қилган ва уларни бевосита саммитга қатнашишдан тийган. Трамп бу орқали БРИCСнинг кучайишига тўсиқ қўйганини таъкидламоқда.
BRICS гуруҳининг ўзи эса ҳозирги кунда глобал молиявий тизимда АҚШ долларининг ҳукмронлигига муқобил яратиш устида иш олиб бормоқда. Аммо Трамп бу ҳаракатларни сустлаштирганини ва Ғарбий альянснинг устунлигини сақлаб қолганини илгари сурмоқда.
