Кеча, Навоийни чангсимон тутун қоплади. Вилоят Экология бошқармаси ахборот хизматига кўра, ушбу оқ тутун тарқалиши "Навоийазот" АЖ корхонаси ва БХО атрофида содир бўлган. Таҳлилларга кўра, атмосфера таркибида, аммиак 1,4 баробар ҳамда водород сулфиди 16,8 баробар меъёрдан юқорилиги аниқланган.
Шунингдек, визуал ўрганиш давомида "Навоийазот" АЖнинг цехида ишлаб чиқариш жараёнида атмосфера ҳавосига ифлослантирувчи ташламалар ташланганлиги аниқланган.
"Навоийазот" АЖ ахборот хизмати эса бошқармадан ёлғон маълумотлар билан асоссиз айб қўймаслигини талаб қилди. Корхона мутахассислари ўша куни текширув ўтказганда ҳаво таркибида аммиак мавжуд эмаслиги аниқланган. Жамиятга қарашли тиомочевина цехи жорий йилнинг феврал ойидан буён фаолият юритмаяпти. Демак, атмосферага водород сулфиди чиққанлиги ҳақидаги маълумот мутлақо асоссиз, дейилади хабарда.
Шунингдек, Углерод икки оксиди эса кўмирнинг чала ёниши натижасида ҳосил бўлиши, "Навоийазот" АЖ маҳсулот ишлаб чиқаришда кўмирдан умуман фойдаланмаслигини асос қилган.
Маълумот учун, корхона бундан олдин Навоийни қоплаган чангсимон тутун ғарбий ҳудуддан (Навоий халқаро аеропорти томондан) ҳавога кўтарилган шамол йўналиши бўйлаб корхона усти ва атрофидан ўтиб кейин бутун шаҳарга тарқалгани, корхонани ҳеч қандай айби йўқлиги ҳақида маълум қилган эди.
