Россиянинг Украинага қарши давом этаётган уруши фонида Европа Иттифоқи Россия Федерациясига қарши янги, 18-чекловчи чоралар пакетини жорий қилди. Тегишли ҳужжатлар 18 июль, жума куни кечқурун Европа Иттифоқининг расмий журналида чоп этилди. Натижада Россияга қарши янги санкциялар кучга кирди.
Яна 22 та Россия банклари, танкерлари ва Россия суверен инвестиция фонди, Россия тўғридан-тўғри инвестиция фонди (РДИФ) ҳам чекловларга дучор бўлди. Европа Иттифоқи Россия нефти нархини бир баррель учун 47,6 долларгача пасайтирди ва “Шимолий оқим” билан ҳар қандай битимларни тақиқлади.
Чеклов чоралари киритилган банклар қаторига Т-Банк, Банк Санкт-Петербург, Dom.RF, Yandex Банк, Озон Банк ва Сургутнефтегазбанк киради. Улар СВИФТ халқаро тўлов тизимидан узилмайди, бироқ транзакцияларни тақиқлаш уларга нисбатан қўлланилади.
Шахсий санкциялар
Чекловлар таниқли россиялик режиссёр ва «Мосфилм» кинокомпанияси бош директори Карен Шахназаров, Вернадский номидаги Қрим федерал университети ректори Владимир Курянов, аннекция қилинган Қрим маданият вазирининг биринчи ўринбосари Олга Бурова ва Ҳудудларни ривожлантириш жамғармасининг собиқ бош директори Илшат Шагиахметовга тегишли.
Рўйхатда Хитой, Ҳиндистон ва Эрон фуқаролари бўлган 14 нафар шахс бор.
