Туркия президенти Ражаб Тоййиб Эрдўғон Озарбайжон ва Россия ўртасидаги муносабатларнинг ёмонлашганига муносабат билдирди. Бу ҳақда Anadolu ёзмоқда.
Қайд этилишича, Эрдўғон Озарбайжонда иқтисодий ҳамкорлик ташкилоти саммитида иштирок этган. Тадбирдан қайтаётганда самолёт бортида Россия—Озарбайжон масаласи ҳақида гапириб ўтган.
“Туркия Озарбайжон билан ҳам, Россия билан ҳам чуқур дипломатик ва стратегик муносабатларга эга. Биз кескинликни диққат билан кузатмоқдамиз ва тинчликка чақирамиз. Энг катта тилагимиз шуки, содир бўлган кўнгилсиз воқеалар Россия ва Озарбайжон ўртасидаги муносабатларга тузатиб бўлмас зарар етказмасин”, — дейди Эрдўғон .
Туркия раҳбарига кўра, ҳар икки томон ҳам ушбу муаммони бартараф этиш кераклигини тушунади.
“Бу масалани ҳал қилиш учун керак бўлган конструктив қадамларни қўллаб-қувватлашда давом этамиз. Бизнинг устувор вазифамиз — қийинчилик билан эришилган барқарорликка путур етказадиган кескинлашувга йўл қўймаслик. Кавказда яна бир можарога тоқат қилолмаймиз”, — дейди у.
МаълумотЕкатеринбургда икки озарбайжонликнинг ўлими Москва ва Боку ўртасидаги муносабатларда мисли кўрилмаган инқирозни келтириб чиқарган. Аммо экспертларга кўра, бу инқирознинг сабаблари сўнгги бир неча йил ичида тўпланиб қолганди.
Озарбайжон Россиянинг Жанубий Кавказдаги таъсирини камайтиришни ва ўзини Москванинг тенг ҳуқуқли ҳамкорига айлантиришни хоҳламоқда.
