30 июнь куни Вазирлар Маҳкамасининг "Республикада нодавлат таълим хизматлари сифатини оширишнинг қўшимча чора-тадбирлари тўғрисида"ги [ВМҚ-403] қарори қабул қилинди. Ҳужжат ЎзА томонидан эълон қилинди.
Унга кўра, лицензиялашнинг қўшимча шартлари қуйидагилардан иборат экани белгиланди. Талабгор томонидан ташкил этилаётган олий таълим ташкилотининг концепцияси тақдим этилади. Концепцияда қуйидагилар кўрсатилади:
- таълим ташкилотининг номи;
- мақоми;
- бошқарув тизими ва кадрлари;
- асосий таълим ва илмий фаолият йўналишлари;
- қабул параметрлари;
- таълим сифатини таъминлаш тизими ва воситалари;
- тўлов-контракт миқдори ва унинг ҳисоб-китоби;
- таълим ташкилотини ривожлантириш бўйича 5 йиллик стратегик режаси;
- таълим ташкилоти фаолиятига оид бошқа муҳим масалалар.
Талабгор томонидан нодавлат олий таълим ташкилотининг таълим жараёни билан бевосита боғлиқ бўлган моддий-техник база, дастурий таъминотни ўз ичига олган дастлабки устав фонди (устав капиталини) 2 млн АҚШ доллари эквивалентидан кам бўлмаган миқдорда шакллантиради. Кейинчалик талабалар сонининг кўпайиб боришига мутаносиб равишда устав фонди ошириб борилади.
Шу билан бирга, талабгор томонидан 350 минг АҚШ доллари эквивалентидаги маблағлар тижорат банкларидаги депозитларга захирага жойлаштирилади.
Ташкил этилаётган олий таълим ташкилотининг таълим жараёнига мўлжалланган бино ва иншоотлари майдони 5 минг кв/метрдан кам бўлмаслиги лозим. Бунда бино университетнинг ўз мулки бўлиши шарт эмас, камида 5 йил муддатга тузилган ижара (текин фойдаланиш) шартномаси асосида иш бошлаш ҳам мумкин.
Олий таълим ташкилоти ташкил этилган вақтдан бошлаб дастлабки 5 йил давомида унинг йиллик соф фойдасининг камида 80 фоизи, кейинги йилларда эса камида 50 фоизи мазкур таълим ташкилотининг асосий фаолиятини ривожлантиришга йўналтиради.
Янги ташкил этиладиган таълим ташкилотлари фаолиятини йўлга куйиш икки босқичда — лицензиялаш асосида ташкил қилиш ҳамда таълим дастурларини махсус давлат аккредитациясидан ўтказиш орқали амалга оширилади.
Қарор кучга киргунга қадар лицензия олган тадбиркорлик субъектлари 2026 йил 1 январга қадар ўз фаолиятини янги лицензия талаблари ва шартлари асосида ташкил этиши лозим.
