Мактабга 6 ёшдан 60 ёшгача бўлган ўқувчилар танлов йўли билан қабул қилинади. Ҳар бир гуруҳларда 12 нафаргача ўқувчилар бўлиши кўзда тутилган. Ўқувчилар шунчаки хаттотлик билангина шуғулланибгина қолмай, ёзув тарихи, ўзбек, араб, форс тиллари ва ёзуви, ҳуснихат, Ғарб мамлакатларида ҳуснихат (лотин ёзуви), Шарқ мамлакатларида ҳуснихат (араб, лотин, кирилл ёзувлари), Китобат санъати билан танишув каби фанларни ўзлаштиради. Ўзбекистондаги Ислом цивилизацияси марказида бўлиб ўтган илмий кенгаш йиғилишида ушбу мактабни ташкил қилиниши ва фаолияти тақдимот қилинди.
Китобат санъати Шарқ мамлакатлари, хусусан, юртимиз ҳудудида ўзига хос йўналишда тадрижий тараққий этган, қадимий ва бебаҳо санъатдир. Бу йўналишда аждодларимиз кўчирган қўлёзма асарлар бетакрор ҳуснихати, ислимий нақшлари, тилла суви билан сайқаллангани қарийб 1000 йил муқаддам ҳам хос кишиларнинг ҳайратига сазовор бўлган.
Бугунги кунга келиб китоблар босмахоналарда бир пайтнинг ўзида минглаб, миллионлаб нусхада нашр қилинса-да, қўл меҳнатининг, айниқса, хаттотлик санъатининг ўрни ҳанузгача беқиёсдир. Қувонарлиси, аждодларимизнинг меросини асраб-авайлаш билан бир қаторда, бу йўналишда ёш шогирдларни ўқитиш имконияти яратилмоқда.
Маданий меросни тиклаш, ёш авлодни маънавий руҳда тарбиялаш, хаттотлик санъатини халқаро даражада танитиш, Ўзбекистоннинг жаҳон маданий марказларидан бири сифатида ривожлантириш мақсадида Ўзбекистондаги Ислом цивилизацияси маркази тасарруфида Халқаро хаттотлик ва китобат санъати мактаби ташкил қилинмоқда.
Мактаб фаолияти Буюк Британия қироллик жамғармаси ҳузуридаги Анъанавий санъат турлари мактаби, UNESCO, Ислом ҳамкорлик ташкилоти, IRCICA (Туркия), Теҳрон Хаттотлик маркази (Эрон), Муҳаммад ибн Салмон маркази (Саудия Арабистони), Шаржа маркази (БАА) каби ташкилотлар билан ҳамкорликда олиб борилади. Мактабга 6 ёшдан 60 ёшгача бўлган ўқувчилар танлов йўли билан қабул қилинади.
Ёш бўйича: 6-12 ёшлилар гуруҳи (бошланғич маълумот), 13-24 ёшлилар гуруҳи (давомчилар), 25 ёшдан юқори (маҳоратга эришиш, соҳа магистрларини тайёрлаш) гуруҳларига бўлинади. Ҳар бир гуруҳларда 12 нафаргача ўқувчилар бўлиши кўзда тутилган. Ўқувчилар шунчаки хаттотлик билангина шуғулланибгина қолмай, ёзув тарихи, ўзбек, араб, форс тиллари ва ёзуви, ҳуснихат, Ғарб мамлакатларида ҳуснихат (лотин ёзуви), Шарқ мамлакатларида ҳуснихат (араб, лотин, кирилл ёзувлари), Китобат санъати билан танишув каби фанларни ўзлаштиради. Эътиборлиси, дарсларнинг амалиётда қўлланишига алоҳида эътибор берилади.
Ўзбекистондаги Ислом цивилизацияси марказида бўлиб ўтган навбатдаги илмий кенгаш йиғилишида ушбу мактабни ташкил қилиш ва фаолияти ҳақида тақдимотлар бўлиб ўтди.
