Тошкент шаҳрида катта миқдордаги фирибгарлик ҳолати фош этилди. Бу ҳақда ДХХ Darakchi’uz хабар берди.
Қайд этилишича, Давлат хавфсизлик хизмати ходимлари ва Ички ишлар департаменти томонидан ўтказилган тезкор тадбир давомида 3 миллион АҚШ доллари миқдорида кредит олиб беришни ваъда қилган фирибгарлар қўлга олинган.
Аниқланишича, Тошкент шаҳрида жойлашган МЧЖ раҳбари, 1979 йилда туғилган, муқаддам судланган аёл, Тошкент вилоятининг Қибрай туманида яшовчи фуқаронинг ишончига кириб, ўзининг мансабдор танишлари орқали акциядорлик тижорат банкларидан биридан йирик миқдорда кредит олиб бера олишини айтган.
Эвазига эса кредит суммасининг 33 фоизини, яъни 990 минг долларни талаб қилган.
Ўтказилган тезкор тадбир вақтида ушбу аёл олдиндан 150 минг АҚШ доллари олган вақтда қўлга олинди. Унинг ноқонуний схемадаги ҳамкори — 1983 йилда туғилган, Урганч шаҳрида яшовчи эркак шахс эса ўзини банк ходими сифатида таништириб, кредит маблағини ажратиб беришни ваъда қилган. У ҳам процессуал тартибда ушланган.
Мазкур ҳолат юзасидан Жиноят кодексининг 168-моддаси 4-қисми “а” банди (катта миқдордаги фирибгарлик) ва 28,211-моддаси 3-қисми “а” банди (пора беришга суиқасд) билан жиноят иши қўзғатилди. Ҳозирда гумондорларга нисбатан қамоқ эҳтиёт чораси қўлланилган бўлиб, тергов ҳаракатлари давом этмоқда.
