Россия президенти Владимир Путин ва Франция президенти Эммануэл Макрон икки йил ичида илк марта телефон орқали мулоқот қилишди. Суҳбат икки соатдан ортиқ давом этди.
Франция томонининг расмий баёнотида айтилишича, Макрон яна бир бор мамлакатининг Украинанинг суверенитети ва ҳудудий яхлитлигига бўлган қатъий қўлловини тасдиқлаган. У, шунингдек, Россия ва Украина ўртасида тезроқ ўт очишни тўхтатиш ва музокараларни бошлашга чақирган.
Кремль сайтида эълон қилинган баёнотда эса Путин Ғарб давлатларини Украинага қурол етказиб, урушни чўзаётганликда айблаган. У шунингдек, ўзининг анъанавий риторикасини такрорлаб, можарони ҳал этиш учун “асосий сабабларни бартараф этиш” ва “жойдаги реал ҳолат”га таяниш зарурлигини таъкидлаган.
Икки етакчи Яқин Шарқдаги вазиятни ҳам муҳокама қилган. Кремль маълумотига кўра, томонлар Эроннинг тинч атом дастурини ривожлантириш ҳуқуқини тан олишган, бироқ Эрон ядро қуролларининг тарқалишини олдини олиш ҳақидаги халқаро мажбуриятларга риоя қилиши лозимлиги таъкидланган.
Путин ва Макрон фикр алмашувни давом эттириш мақсадида яна мулоқот қилишга келишиб олишган.
