Россия Президенти Владимир Путин Ўзбекистон Президенти Шавкат Мирзиёевнинг тўнғич қизи, Президент ёрдамчиси Саида Мирзиёеванинг Россияга ташрифини эътироф этиб, унинг ёшлар масаласидаги ишларига тўхталди. Бу ҳақда у кеча, 18 июнь куни дунёнинг етакчи ахборот агентликлари раҳбарлари билан учрашувда сўз очди.
Путин Ўзбекистон Миллий ахборот агентлиги бош директори Абдусаид Кўчимовнинг ёшларга оид аниқ лойиҳалар ва йўналишларни ўз ичига олган кенг қамровли узоқ муддатли ёшлар алмашинуви дастурини қабул қилиш имконияти ҳақидаги саволига жавобан, ёшлар билан ишлашнинг муҳимлиги ва аҳамиятини таъкидлаган.
“Шавкат Миромоновичнинг ёрдамчиси – Саида Шавкатовна яқинда Москвада бўлиб, Ҳукуматда менинг кўплаб ҳамкасбларим билан, Президент Администрациясида учрашувлар ўтказди. У айнан Президент топшириғига биноан ёшлар ўртасидаги алоқаларни ривожлантириш ва ёшлар йўналишини илгари суришга катта эътибор қаратмоқда. Бу борада аниқ таклифлар бор ва биз, албатта, барчамиз биргаликда бунинг устида ишлаймиз. Бу йўналиш (ёшлар масаласи) энг муҳим йўналишлардан бири – бу аниқ”, деган Путин.
Қайд этиш жоиз, у мазкур учрашувда Россия ва Ўзбекистон раҳбарлари миграция масалаларини биргаликда ҳал қилишга келишиб олганини маълум қилган эди. Хусусан, Путин бу борада ёшларга эътибор қаратиш муҳимлигини айтган.
