Европа Иттифоқи 10 июнь куни Россияга қарши янги санкциялар пакетини эълон қилди. Бу ҳақда CNN хабар берди.
Иттифоқнинг фикрича, Москванинг Украинага қарши ҳар кунги ҳужумлари унинг тинчликдан манфаатдор эмаслигини кўрсатмоқда.
Янги санкциялар пакети Кремлнинг нефть ва газ қазиб олишдан пул ишлаш қобилиятини нишонга олган. Бу Россия 2022 йилда Украинага қарши кенг кўламли босқинни бошлаганидан бери 18-санкция ҳисобланади.
Санкция Россия нефти экспорти нархининг юқори чегарасини бир баррел учун 60 доллардан 45 долларгача пасайтиришни кўзда тутади. Бундан ташқари, у учинчи мамлакатлардаги Россия банклари ва молия институтлари билан операцияларни тўлиқ тақиқлашни ўз ичига олади.
ЕИ, шунингдек, Россия энергетика инфратузилмасидан фойдаланишни тақиқлашни таклиф қилмоқда. Иттифоқ мамлакатларига “Шимолий оқим” қувурлари билан боғлиқ ҳар қандай операцияларда бевосита ёки билвосита иштирок этиш ҳам тақиқланиши билдирилган.
Янги пакет Европа Иттифоқининг 27 давлати томонидан тасдиқланиши керак бўлади. Бунда Венгрия ва Словакия каби Кремль тарафдори бўлган баъзи ҳукуматлар жараённи мураккаблаштириши мумкинлиги айтилган. Аввалроқ иккала давлат ҳам санкцияларни блоклаш билан таҳдид қилган бўлса-да, ҳозирда улар тақиқларни ёқлаб овоз берган.
Еврокомиссия раҳбари Урсула фон дер Ляйен санкциялар “куч Россия тушунадиган ягона тил бўлгани учун” зарурлигини айтган.
“Биз Украинага тинчлик тилаймиз. Украина президенти Владимир Зеленскийнинг сўзсиз ўт очишни тўхтатиш таклифига қарамай, Россия Украинага ўлим ва вайронагарчилик келтиришда давом этмоқда. Россиянинг мақсади тинчлик эмас, балки куч ҳукмронлигини ўрнатишдир. Шунинг учун биз Россияга босимни кучайтирмоқдамиз”, деди Фон дер Ляйен.
Германия, Франция, Буюк Британия ва Польша раҳбарлари май ойида Россия етакчиси Владимир Путинга 30 кунлик ўт очишни тўхтатишга рози бўлишини ёки эҳтимолий “қаттиқ” санкцияларга дуч келишини айтган эди. Путин ультиматумни эътиборсиз қолдириб, унинг ўрнига Москва ва Киев ўртасида тўғридан тўғри музокаралар ўтказишни таклиф қилганди.
ЕИ нима учун Россиянинг энергетика секторини нишонга олганини тушунтирар экан, комиссия раҳбари нефть экспорти ҳали ҳам Россия ҳукумати даромадларининг 1/3 қисмини ташкил этишини ва бу даромад манбайини қисқартириш керак эканлигини айтган.
Нефть нархининг юқори чегараси 2022 йил декабрь ойида Европа Иттифоқи ва G7 давлатлари томонидан жорий этилган.
