Tesla ва SpaceX раҳбари, DOGE (Ҳукумат самарадорлиги департаменти) собиқ раҳбари Илон Маск АҚШ президенти Дональд Трампга нисбатан айтган сўзларидан афсусда эканини билдирди.
"Мен ўтган ҳафтада АҚШ президенти Дональд Трамп ҳақидаги баъзи постларимдан афсусдаман. Улар ҳаддан ошиб кетди", — деб ёзди Маск Х ижтимоий тармоғида.
Миллиардер қайси постлар ҳақида гап кетаётганига аниқлик киритмаган.
Сўнгги кунларда у Лос Анжелесдаги норозилик намойишлари фонида Трампнинг иммиграция сиёсатини қўллаб-қувватловчи твитларни ҳам репост қилди.
Трамп ҳозирча Маскнинг узрларига жавоб бермади.
Маск ва Трамп ўтган ҳафта бизнесмен Конгрессдан ўтаётган "Катта ажойиб билль"ни (Big Beautiful Bill) танқид қилганидан кейин очиқчасига жанжаллашиб қолди. Ҳужжат солиқ имтиёзларини назарда тутади ва Трампнинг сайловолди ваъдаси эди.
Маск унинг қўллаб-қувватлашисиз Трамп президентлик сайловларида ғалаба қозона олмаган бўлишини айтди ва уни ношукурликда айблади. Шунингдек, унинг сўзларига кўра, Трамп "Эпштейн файллари" деб аталадиган — вояга етмаганларга зўравонлик қилиш ва уларни фоҳишаликка жалб қилишда айбланган молиячи Жеффри Эпштейн (у 2019 йилда қамоқхонада ўз жонига қасд қилган) билан боғлиқ эълон қилинмаган файлларда иштирок этган. Кейинчалик Маск бу постни ўчириб ташлади.
Трамп бунга жавобан миллиардернинг компаниясини давлат шартномаларидан маҳрум қилиш билан таҳдид қилди.
- Маск Трампнинг номзодини очиқчасига қўллаб-қувватлаган, унинг сайловолди кампаниясида фаол иштирок этган ва уни молиялаштирган. Тадбиркор 2024 йилги сайловларга 290 миллион доллардан ортиқ маблағ сарфлаб, Трампнинг АҚШ президенти ва республикачиларнинг Конгрессга сайланишини қўллаб-қувватлаганди.
