Telegram асосчиси Павел Дуров америкалик журналист Такер Карлсонга берган иккинчи интервьюсида Францияда бўлиб тургани, мамлакатни рухсатсиз тарк эта олмаслиги ва болалари ҳамда онаси билан учрашолмаётганини айтди.
Дуровнинг сўзларига кўра, дастлаб Франция ҳукумати Telegram сўровларга жавоб бермаётганидан шикоят қилган, бироқ кейинчалик ҳеч қандай расмий сўров бўлмаганлиги аниқланган.
Бугунги кунга келиб, уни жиноятчилар Телеграмдан фойдалангани ва уларга қарши етарли чоралар кўрмагани учун “соҳавий ҳамкор” сифатида айблашмоқда.
Дуров бу айбловни ҳаддан ташқари кенг талқин деб ҳисоблайди. Унинг айтишича, Telegram дунё бўйлаб 1 миллиард фойдаланувчига эга ва компания юридик масалаларга катта маблағ ажратмоқда.
Дуров, шунингдек, ҳибсга олингач, 4 кун ойнасиз ва тўшаксиз камерада ушлаб турилганини билдирди. У телефонни фақат Телеграмни тест қилиш учун ишлатганини, ҳаттоки унда СИМ-карта ҳам бўлмаганини таъкидлади.
Дуров телефонни доимий олиб юрмаслигини, биринчидан — ҳукуматлар унга Pegasus каби кузатув дастурларини ўрнатиши мумкинлигини, иккинчидан эса — бу чалғитишини айтди.
