Ўзбекистоннинг бир қатор ҳудудларида ер участкаларини ноқонуний сотишга уринган шахслар ДХХ ва тегишли идоралар ҳамкорлигидаги тезкор тадбирлар натижасида ушланди. Улар талаб қилган маблағлар умумий ҳисобда 500 минг АҚШ долларидан ошган.
Хоразмда боғдорчилик йўналишидаги МЧЖ раҳбари 19,9 гектар ерни “30 гектар” деб кўрсатиб, расмийлаштириш ва кўп қаватли уй қуриш учун рухсат олиб бериш эвазига 180 минг доллар талаб қилган. У пулни олган пайтида ашёвий далиллар билан қўлга олинди.
Фарғонада Кадастр агентлигининг Қўқон шаҳри бўлими етакчи инспектори фермер хўжалиги ер олиши ва иссиқхона қурилиши учун 150 минг доллар сўраган. У ҳам пулни қабул қилган вақтда ушланган.
Тошкент вилояти Ангрен шаҳрида яшовчи, судланган шахс 2 гектардан ортиқ ерни 100 минг долларга сотишни ва расмийлаштириш учун қўшимча 21 минг доллар талаб қилган. У 121 минг долларни олганида ушланган.
Сурхондарё вилоятида “Тўпаланг-Қоратоғ” ирригация тизими ходими 32 сотих муҳофаза ер майдонини шахсий мулк сифатида расмийлаштириб бериш учун 70 минг доллар ва 39 млн сўм олган. У ҳам жиноий ҳаракати пайтида ушланган.
Ҳозирда барча ҳолатлар бўйича жиноят иши қўзғатилиб, тергов ҳаракатлари олиб борилмоқда.
