Исроил делегацияси Қатардан қайтарилиб, музокаралар тўхтагани расман эълон қилинган бўлса-да, контактлар давом этмоқда. Ynet нашри ёзишича, Исроил хавфсизлик хизматлари ҳарбий босим ҲАМОСга таъсир кўрсатаётганини, аммо бу ҳали етарли эмаслигини қайд этмоқда. Шунинг учун мақолада ҳарбий ҳаракатларнинг "кучайтирилиши кутилмоқда", деб ёзилади.
Хабарга кўра, Исроил бош вазири Бинямин Нетаняху АҚШ вакилларининг босими остида хавфсизлик соҳаси раҳбарлари билан фавқулодда учрашув ўтказган. Америка томони Исроилдан Ғазода ҳарбий ҳаракатларни кучайтиришни кечиктиришни сўраган — бу эса уларга асирлар алмашинуви бўйича музокаралар учун кўпроқ вақт беради. Вашингтон шундай йўл билан ҲАМАС билан тўғридан-тўғри алоқалар канали ҳали ҳам фаол эканини, дипломатик имкониятлар тўлиқ тугамаганини билдирмоқда.
Шу билан бирга, Al Mayadeen нашри хабарига кўра, АҚШ ва ҲАМАС ўртасида воситачи бўлган бизнесмен янги келишув таклифини тақдим этган. Таклиф ўт очишни 60 кунга тўхтатиш ва бу даврда 2 босқичда 5 нафар тирик ва 5 нафар ҳалок бўлган гаровдагиларни озод қилишдан иборат.
Таъкидлаш керак, таклифларга кўра, ўт очиш тўхтаган пайтда урушни тўхтатиш бўйича музокаралар ўтказилади. Ҳар куни Ғазо секторига 1.000 та инсонпарварлик ёрдами юк машиналари киритилади.
Мазкур ташаббус Вашингтоннинг дипломатик каналлар орқали муаммони ҳал қилишга умиди ҳали сўнмаганини кўрсатмоқда.
Абдуллоҳ Саййид
