Трамп туфайли АҚШ фуқаролари Британия фуқаролигини олиш учун рекорд даражада ариза топширди.
2025 йилнинг дастлабки уч ойида — Дональд Трамп президентликка қайтганидан сўнг — 1930 нафардан ортиқ АҚШ фуқароси Британия фуқаролигини олиш учун ҳужжат топширди. Бу бутун кузатувлар тарихи давомида қайд этилган энг юқори кўрсаткичдир.
Financial Times нашрининг ёзишича, Британия фуқаролигини олиш учун берилган аризалар сони бўйича АҚШ фуқаролари орасида рекорд даража 2025 йилнинг январь-март ойлари давомида қайд этилган.
Ушбу уч ойлик даврда 1930 нафардан зиёд америкалик фуқароликка даъвогарлик қилган — бу ўтган чорак билан солиштирганда 12 фоизга кўп ва кузатувлар бошланганидан бери энг юқори кўрсаткич ҳисобланади.
Нашр таъкидлашича, Британияга кўчиб ўтишга қизиқишнинг ортиши Дональд Трампнинг АҚШ президентлигига қайтиши билан боғлиқ. Иммиграция соҳасидаги ҳуқуқшунослар мурожаатлар сони кескин ошганини тасдиқламоқда. Улар асосий сабаблар сифатида келажак учун хавотир, руҳий тушкунлик ва молиявий барқарорликка интилиш каби омилларни кўрсатмоқда.
Сўровномада қатнашган мутахассислардан бири шундай деган:
"Одамлар қўрқув, руҳий чарчоқ ва молиявий хавфсизлик истагини ҳис қилмоқда".
Мутахассислар Трампнинг қайта президентликка келиши ортидан америкаликлар орасида эмиграция кайфияти ортиб бораётганини қайд этмоқда.
Ўтган йил охирида ҳам АҚШдаги кўплаб йирик компаниялар раҳбарлари Трампнинг инаугурациясини кутар экан, лавозимларини тарк этгани ҳақида хабар берилган эди.
Шу билан бирга, президентлик сайловларидан сўнг АҚШни тарк этишни режалаштираётган бой фуқаролар сони ҳам рекорд даражага етган, сабаб эса сиёсий беқарорлик ва ижтимоий нотинчлик хавфидир.
Ҳатто The Washington Post нашри Трамп ғалабасидан сўнг мамлакатни тарк этишни хоҳлаётган америкаликлар учун қўлланма чоп этган — унда Канада ва бошқа мамлакатларга кўчиб ўтиш имкониятлари кўриб чиқилган.
Абдуллоҳ Саййид
