2025 йил 4 апрель куни Тошкент шаҳри Сирғали туманида жойлашган “Мударрис” хусусий мактабида ўқитувчи ва ўқувчи ўртасида юзага келган зўравонлик ҳолати бўйича очиқ сайёр суд мажлиси ўтказилди. Бу ҳақда Тошкент шаҳар суди darakchi.uz га хабар берди.
Аниқланишича, мактабнинг ўқитувчиси Т.А. 7-синфда таҳсил олувчи А. Ани бошига ва кўкрак қисмига урган. Бу ҳаракатлар оқибатида ўқувчи енгил тан жароҳати олган. Воқеа иштирокчилари — ўқувчи, унинг отаси, шифокор ва ўқитувчининг ўзи судда шахсан иштирок этиб, кўрсатмалар берди.
Суд тиббий экспертиза хулосаси, гувоҳлар сўроғи ва ҳужжатлар асосида ўқтувчини айбли деб топди ва унга нисбатан Маъмурий жавобгарлик тўғрисидаги кодекснинг 52-моддаси 2-қисмига мувофиқ 1.500.000 сўм миқдорида жарима жазоси тайинлади.
Суд томонидан таъкидланганидек, ўқитувчи ўз касбий масъулиятини суиистеъмол қилган ҳамда ўқувчига нисбатан жисмоний куч ишлатиш орқали қонун бузилишига йўл қўйган.
Бу воқеа таълим муассасаларида болалар хавфсизлиги ва ўқитувчиларнинг масъулияти қанчалик муҳим эканини яна бир бор кўрсатмоқда.
