Жорий йилнинг 5 март куни Тошкент вилоятининг Чирчиқ шаҳрида яшовчи 32 ёшли фуқаро спиртли ичимликлар сотувчи дўкон эгаси билан жанжаллашиб, жароҳат олган ва оқибатда вафот этган. Бу ҳақда darakchi.uz'га Бош прокуратура матбуот котиби Ҳаёт Шамсутдинов маълум қилди.
Қайд этилишича, соат тахминан 19:00 ларда Тошкент вилояти Паркент туманида туғилган фуқаро Чирчиқ шаҳрида жойлашган, ўзига тегишли бўлган спиртли ичимликлар дўконини ёпиб, уйига қайтиб кетаётган вақтида ўзига аввалдан таниш бўлган бошқа бир фуқарони учратиб қолган. Таниши спиртли ичимлик дўконини очиб, унга спиртли ичимлик беришини сўраган. Шунда дўкон эгаси танишига рад жавобини берган. Оқибатда икки ўртада жанжал келиб чиққан. Дўкон эгаси танишини бош ва юз қисмига бир неча маротаба уриб, унга оғир тан жароҳати етказган.
Оқибатда фуқаро олган тан жарохатлари билан Чирчиқ шаҳар тиббиёт бирлашмасига олиб борилган. Тиббиёт бирлашмасининг маълумотномасига кўра, фуқаро “бош мия очиқ жарохати, бош мия лат ейиши, чап чакка тепа суяклари очиқ синиши, бошни ўнг қош тепа чап чакка тепа соҳаси эзилиб йиртилган жарохати, травматик шок” кўринишидаги тан жарохатлари мавжудлиги аниқланган.
Эртаси куни, 6 мартда шифокорлар томонидан кўрсатилган тиббий ёрдамга қарамасдан жароҳатланган фуқаро реанимация бўлимида вафот этган.
Мазкур ҳолат бўйича дўкон эгасига нисбатан Чирчиқ шаҳар ИИБ ҳузуридаги Тергов бўлими томонидан Жиноят Кодексининг 104-моддаси (қасддан баданга оғир шикаст етказиш) 3-қисми “д” банди билан жиноят иши қўзғатилиб, дастлабки тергов ҳаракатлари олиб боришга киришилган ва айбланувчи қўлга олинган.
Маълумот учун, қонунчиликка кўра, бундай жиноятни содир этган шахс саккиз йилдан ўн йилгача озодликдан маҳрум қилиниши мумкин.
