Президент Шавкат Мирзиёев Тожикистон раҳбари Эмомали Раҳмон билан учрашув ўтказди. Бу ҳақда давлат раҳбарининг матбуот хизмати маълум қилди.
Қайд этилишича, учрашувда икки давлат раҳбари олий даражадаги келишувларни амалга ошириш доирасида икки томонлама дўстлик, стратегик шериклик ва иттифоқчилик муносабатларини ривожлантириш масалалари муҳокама қилинган.
“Суҳбат аввалида давлат раҳбарлари муборак Рамазон ҳайити билан бир-бирларини ва биродар халқларимизни самимий табрикладилар”,— дейилади хабарда.
Бундан ташқари, икки давлат раҳбари 2024-йилда мамлакатлар ўртасида товар айирбошлаш ҳажми 700 миллион доллардан ошганини тўғрисида суҳбатлашган.
Саноат, энергетика, электротехника, тўқимачилик, қишлоқ хўжалиги ва бошқа устувор соҳаларда кооперация лойиҳалари муваффақиятли амалга оширилаётганига тўхталган.
Ҳукуматлараро комиссиянинг бўлажак йиғилишида амалий ҳамкорлик бўйича қўшма лойиҳаларни тезлаштириш чоралари ишлаб чиқилиши муҳим экани таъкидланган.
Шунингдек, етакчилар минтақавий кун тартиби, шу жумладан Ўзбекистонда ўтказиладиган кўп томонлама саммитлар юзасидан ҳам фикр алмашган.
