Хитой армиясидаги коррупция унинг 2027 йилгача мўлжалланган ҳарбий модернизация мақсадлари сари олға силжишини тўхтатган бўлиши мумкин, дейилади Пентагон эълон қилган Пекин армияси бўйича йиллик ҳисоботида.
Ўтган йилдан бери Хитой армиясида коррупцияга қарши кенг қамровли тозалаш ишлари олиб борилди ва ўтган ой Мудофаа вазирлиги юқори мартабали ҳарбий амалдор лавозимидан четлаштирилгани ва "интизомни жиддий бузганлик" учун тергов остида эканлигини айтди.
Пентагоннинг кенг қамровли ҳисоботида айтилишича, 2023 йилнинг июл-декабр ойлари оралиғида камида 15 нафар юқори мартабали хитойлик ҳарбий офицер ва мудофаа саноати раҳбарлари ўз лавозимларидан четлаштирилган.
"2023 йилда Хитой Халқ озодлик армияси коррупция билан боғлиқ тергов ва юқори мартабали раҳбарларни лавозимидан четлаштиришнинг янги тўлқинини бошдан кечирди, бу унинг 2027 йилга мўлжалланган модернизация мақсадларига эришиш йўлида ҳаракатланишига тўсқинлик қилиши мумкин", дейилади ҳисоботда.
AҚШ расмийлари, жумладан, Марказий разведка бошқармаси раҳбари Хитой раҳбари Си Цзинпин ўз ҳарбийларига 2027 йилгача Тайванга бостириб киришга тайёр туришни буюрганини айтди.
Хитойнинг 2027 йилгача модернизация қилиш бўйича расмий мақсадлари разведка, механизация ва бошқа воситаларни интеграциялашувини тезлаштириш ҳамда ҳарбий назариялар, кадрлар, қурол-яроғ ва техникани модернизация қилиш тезлигини оширишни ўз ичига олади, деган Пентагон.
Хитой ташқи ишлар вазирлиги ҳисоботни "масъулиятсизлик" деб баҳолади ва буни AҚШнинг ҳарбий гегемонлигини сақлаб қолиш учун баҳона деб атади.
"AҚШ ҳисоботи, аввалги шунга ўхшаш ҳисоботлар каби, фактларни эътиборсиз қолдиради ва бир хиллик билан тўла", деди вазирлик вакили Лин Жиан пайшанба куни бўлиб ўтган брифингда ва AҚШни бундай ҳисоботлар беришни тўхтатишга чақирди.
