Дипломатик манбалар Туркияда ҳозирда бирорта ҳам исроиллик дипломат йўқлигини билдирди.
Бу ҳақда Исроил ташқи ишлар вазири Эли Коеннинг дипломатларини Туркиядан чақириб олиш ҳақидаги баёнотига изоҳ берар экан, дипломатик манбалар маълум қилган.
“Ҳозирда Туркияда бирорта ҳам исроиллик дипломат йўқ. Улар 19 октябрда мамлакатни тарк этган эди. 18 октябрь куни вазирлигимизга юборган нотада сўнгги воқеалардан келиб чиқиб, элчихона дипломатлари 19 октябрдан бошлаб Туркияни тарк этиши айтилган”, — деди манба.
“Коен кимга буйруқ берганини тушуниш қийин. Чунки у гапираётган дипломатлар аллақачон мамлакатимизни тарк этиб бўлган”, — дея қўшимча қилди манба.
Исроил дипломатлари, жумладан Исроилнинг Анқарадаги элчиси Ирит Лилиан 19 октябрь куни “хавфсизлик” сабабли Туркияни тарк этишга қарор қилган.
Эслатиб ўтамиз, Исроил ТИВ раҳбари икки томонлама муносабатларни қайта кўриб чиқиш учун Туркиядан дипломатларни чақириб олаётганини маълум қилган эди.
