Россия президенти Путин 23 август куни Твер вилоятидаги авиаҳалокатда ҳалок бўлган Вагнер ПМС асосчиси Евгений Пригожин ва бошқа одамларнинг жасадларидан граната бўлаклари топилганини маълум қилди, деб ёзади BBC.
“Кеча куни Тергов қўмитаси раҳбари менга авиаҳалокатда ҳалок бўлганларнинг жасадларидан қўл гранаталари бўлаклари топилгани ҳақида хабар берди. Самолётга ҳеч қандай ташқи таъсир кўрсатилмаган. Бу аллақачон тасдиқланган факт — Россия Федерацияси Тергов қўмитаси томонидан ўтказилган экспертиза натижалари”, — деди Путин.
Путиннинг сўзларига кўра, Пригожин самолёти ҳалокати бўйича тергов ҳали якунланмаган.
Эслатиб ўтамиз, 23 август куни Твер вилояти, Бологовский тумани, Куженкино қишлоғи яқинида самолёт ҳалокатга учради. Йўловчилар рўйхатида Евгений Пригожин ҳам бор эди. Федерал ҳаво транспорти агентлиги ҳалокатга учраган Эмбраэр йўловчилари рўйхатини эълон қилди. 27 август куни Россия Федерацияси Тергов қўмитаси Евгений Пригожиннинг ўлимини тасдиқлади.
Пригожин 2023 йил июнь ойида тўсатдан бошлаган қўзғолони билан эсда қолди.
