Бироз аввал, Чилонзор туманида 29 та кўп йиллик дарахт йўловчилар ҳаётига хавф туғдираётганлиги сабаб кесиб ташлангани ҳақида хабар берган эдик.
Мазкур ҳолат юзасидан Экология, атроф-муҳитни муҳофаза қилиш ва иқлим ўзгариши вазирлиги расмий муносабат билдирди.
Аниқланишича, мазкур кесилган дарахтлар 2021 йилда полиетилен плёнка билан ёпиб чиқилганлиги сабаб қуриб қолган. Бунга сабаб деб, дарахтларнинг ости ландшафт дизайн қилиниши келтирилган.
Натижада 2022 йилда ҳолат ўрганилиб, прокуратура органларига қуриганлик ҳолати бўйича ҳужжатлар расмийлаштирилган. Сўнгра Ички ишлар органига суриштирувга берилган. 2022 йилнинг сентябр ойида эса ҳужжат тугатилган.
Таъкидланишича, жорий йилнинг май ойида ёғингарчилик ва шамол туфайли Лутфий кўчасидаги қуриган дарахтлардан бири қулаб тушган ва йўл ёпилиб, аҳолига ва йўловчиларга анча ноқулайлик келтириб чиқарган.
"Лутфий маҳалласи аҳолисидан эса қуриган ва йўловчилар ҳаёти учун хавфли бўлган дарахтларни кесиб олиб ташлаш ҳамда ўрнига бошқа ўсимликлар экиш бўйича мурожаатлар ҳам келиб тушган. Шуларни инобатга олган ҳолда дарахтларнинг ҳолати ўрганилиб, ростдан ҳам қуриб қолганлиги аниқланган 29 та дарахт кесилган", - дейилади хабарда.
Дарахтлар кесилган ҳудудда 30 та дарахт ҳамда 1020 та бута экилиши режалаштирилган.
Ҳозирда мазкур ҳолат бўйича Бош прокуратура томонидан аввалги ҳолат ҳамда хулоса берилиши ҳолатларига ҳуқуқий баҳо бериш бўйича ўрганиш ишлари олиб борилмоқда.
Вазиятни батафсил ўрганиб чиққан Тошкент шаҳар ҳокимлиги эса қуйидагиларни маълум қилди:
Ҳар бир жонли дарахт бебаҳо эканлигини тушунган, аммо вазиятнинг жиддийлигини ҳисобга олган ҳолда, ҳар бир кесилган дарахтнинг ўрнига камида 2 ёшли 10 та шумтол кўчатларини, шунингдек, кўплаб буталар: Сурия атиргуллари, ионимуслар, фотиниялар, лизидийлар, ҳинд настаринини экиш вазифаси қўйилди.
Пойтахтнинг Чилонзор туманидаги Лутфий кўчаси 2024-йилга мўлжалланган чуқур реконструкция қилиш режасига киритилгани инобатга олиниб, реконструкция тўлиқ тугатилгунга қадар янги экилган кўчатларни суғориш вақтинчалик махсус суғориш машиналари ёрдамида амалга оширилади. Қайд этиш жоизки, реконструкция ишлари доирасида дарахт ва буталарни автоматик томчилатиб суғориш тизими таъминланади.
