Biroz avval, Chilonzor tumanida 29 ta ko`p yillik daraxt yo`lovchilar hayotiga xavf tug`dirayotganligi sabab kesib tashlangani haqida xabar bergan edik.
Mazkur holat yuzasidan Ekologiya, atrof-muhitni muhofaza qilish va iqlim o`zgarishi vazirligi rasmiy munosabat bildirdi.
Aniqlanishicha, mazkur kesilgan daraxtlar 2021 yilda polietilen plyonka bilan yopib chiqilganligi sabab qurib qolgan. Bunga sabab deb, daraxtlarning osti landshaft dizayn qilinishi keltirilgan.
Natijada 2022 yilda holat o`rganilib, prokuratura organlariga quriganlik holati bo`yicha hujjatlar rasmiylashtirilgan. So`ngra Ichki ishlar organiga surishtiruvga berilgan. 2022 yilning sentyabr oyida esa hujjat tugatilgan.
Ta`kidlanishicha, joriy yilning may oyida yog`ingarchilik va shamol tufayli Lutfiy ko`chasidagi qurigan daraxtlardan biri qulab tushgan va yo`l yopilib, aholiga va yo`lovchilarga ancha noqulaylik keltirib chiqargan.
"Lutfiy mahallasi aholisidan esa qurigan va yo`lovchilar hayoti uchun xavfli bo`lgan daraxtlarni kesib olib tashlash hamda o`rniga boshqa o`simliklar ekish bo`yicha murojaatlar ham kelib tushgan. Shularni inobatga olgan holda daraxtlarning holati o`rganilib, rostdan ham qurib qolganligi aniqlangan 29 ta daraxt kesilgan", - deyiladi xabarda.
Daraxtlar kesilgan hududda 30 ta daraxt hamda 1020 ta buta ekilishi rejalashtirilgan.
Hozirda mazkur holat bo`yicha Bosh prokuratura tomonidan avvalgi holat hamda xulosa berilishi holatlariga huquqiy baho berish bo`yicha o`rganish ishlari olib borilmoqda.
Vaziyatni batafsil o`rganib chiqqan Toshkent shahar hokimligi esa quyidagilarni ma`lum qildi:
Har bir jonli daraxt bebaho ekanligini tushungan, ammo vaziyatning jiddiyligini hisobga olgan holda, har bir kesilgan daraxtning o`rniga kamida 2 yoshli 10 ta shumtol ko`chatlarini, shuningdek, ko`plab butalar: Suriya atirgullari, ionimuslar, fotiniyalar, lizidiylar, hind nastarinini ekish vazifasi qo`yildi.
Poytaxtning Chilonzor tumanidagi Lutfiy ko`chasi 2024-yilga mo`ljallangan chuqur rekonstruksiya qilish rejasiga kiritilgani inobatga olinib, rekonstruksiya to`liq tugatilgunga qadar yangi ekilgan ko`chatlarni sug`orish vaqtinchalik maxsus sug`orish mashinalari yordamida amalga oshiriladi. Qayd etish joizki, rekonstruksiya ishlari doirasida daraxt va butalarni avtomatik tomchilatib sug`orish tizimi ta`minlanadi.
