Жорий йилнинг 15 сентябрь куни Сенатнинг Ёшлар, маданият ва спорт масалалари қўмитаси томонидан ташкил этилган семинарда Оилавий болалар уйлари фаолияти ҳамда “Меҳр дафтари” жамғармаси маблағларининг мақсадли сарфланиши юзасидан депутатлик назоратини ўрнатиш масалалари муҳокама қилинди.
Мақсад маҳаллий Кенгашлар депутатларининг оилавий болалар уйлари фаолиятида ҳамда “Меҳр дафтари” жамғармаси маблағларининг мақсадли сарфланишида фаол депутатлик назоратини олиб бориш, ижтимоий ҳимояга муҳтож етим ва ота-она қарамоғидан маҳрум бўлган болаларни қўллаб-қувватлашда депутатлар ўрнини оширишдан иборат.
Семинарда сенаторлар, маҳаллий Кенгашлар депутатлари, манфаатдор вазирлик ва идоралар масъуллари, Ёшлар парламенти аъзолари ҳамда оммавий ахборот воситалари вакиллари иштирок этди.
Таъкидланганидек, давлатимиз раҳбари ташаббуси билан етим ва ота-она қарамоғидан маҳрум бўлган болаларни ҳар томонлама қўллаб-қувватлаш ҳамда Меҳрибонлик муассасалари фаолияти ислоҳ қилинмоқда. Жумладан, бу борада Ўзбекистон Республикаси Президентининг 1 та Фармони ва 3 та қарори қабул қилинди. Шунингдек, оилавий болалар уйлари ташкил қилишнинг ҳуқуқий асоси яратилди.
Олиб борилган саъй-ҳаракатлар натижасида 23 та Меҳрибонлик муассасаси ва болалар уйининг фаолияти тугатилди, шундан 14 таси Меҳрибонлик уйи, 4 таси болалар шаҳарчаси ва 5 таси болалар уйи ҳисобланади.
Бугунги кунда 2 та Меҳрибонлик уйида 255 нафар бола, 3 та “СОС - Ўзбекистон болалар маҳаллалари”да 164 нафар бола, 8 та болалар (гўдаклар) уйида 340 нафар, 137 та оилавий болалар уйида 739 нафар бола тарбияланмоқда.
Етим болалар ва ота-она қарамоғидан маҳрум бўлган болаларнинг муаммоларини ўрганиш ҳамда ҳал этиш, уларнинг орзу-истакларини рўёбга чиқаришга кўмаклашиш мақсадида “Меҳр дафтари” тизими амалиётга жорий этилди.
“Меҳр дафтари” платформаси ишга туширилиб, бугунги кунда унга 8 921 нафар (4610 нафар ўғил ва 4311 нафар қиз) бола киритилган, 4 452 нафар боланинг муаммолари ўрганилиб, 3 171 нафар боланинг масаласи ижобий ҳал этилди.
Уй-жойга муҳтож етим болалар ва ота-она қарамоғидан маҳрум бўлган 406 нафар боланинг 388 нафарига уй-жойлар берилди.
