Joriy yilning 15 sentyabr kuni Senatning Yoshlar, madaniyat va sport masalalari qo`mitasi tomonidan tashkil etilgan seminarda Oilaviy bolalar uylari faoliyati hamda “Mehr daftari” jamg`armasi mablag`larining maqsadli sarflanishi yuzasidan deputatlik nazoratini o`rnatish masalalari muhokama qilindi.
Maqsad mahalliy Kengashlar deputatlarining oilaviy bolalar uylari faoliyatida hamda “Mehr daftari” jamg`armasi mablag`larining maqsadli sarflanishida faol deputatlik nazoratini olib borish, ijtimoiy himoyaga muhtoj etim va ota-ona qaramog`idan mahrum bo`lgan bolalarni qo`llab-quvvatlashda deputatlar o`rnini oshirishdan iborat.
Seminarda senatorlar, mahalliy Kengashlar deputatlari, manfaatdor vazirlik va idoralar mas`ullari, Yoshlar parlamenti a`zolari hamda ommaviy axborot vositalari vakillari ishtirok etdi.
Ta`kidlanganidek, davlatimiz rahbari tashabbusi bilan etim va ota-ona qaramog`idan mahrum bo`lgan bolalarni har tomonlama qo`llab-quvvatlash hamda Mehribonlik muassasalari faoliyati isloh qilinmoqda. Jumladan, bu borada O`zbekiston Respublikasi Prezidentining 1 ta Farmoni va 3 ta qarori qabul qilindi. Shuningdek, oilaviy bolalar uylari tashkil qilishning huquqiy asosi yaratildi.
Olib borilgan sa`y-harakatlar natijasida 23 ta Mehribonlik muassasasi va bolalar uyining faoliyati tugatildi, shundan 14 tasi Mehribonlik uyi, 4 tasi bolalar shaharchasi va 5 tasi bolalar uyi hisoblanadi.
Bugungi kunda 2 ta Mehribonlik uyida 255 nafar bola, 3 ta “SOS - O`zbekiston bolalar mahallalari”da 164 nafar bola, 8 ta bolalar (go`daklar) uyida 340 nafar, 137 ta oilaviy bolalar uyida 739 nafar bola tarbiyalanmoqda.
Etim bolalar va ota-ona qaramog`idan mahrum bo`lgan bolalarning muammolarini o`rganish hamda hal etish, ularning orzu-istaklarini ro`yobga chiqarishga ko`maklashish maqsadida “Mehr daftari” tizimi amaliyotga joriy etildi.
“Mehr daftari” platformasi ishga tushirilib, bugungi kunda unga 8 921 nafar (4610 nafar o`g`il va 4311 nafar qiz) bola kiritilgan, 4 452 nafar bolaning muammolari o`rganilib, 3 171 nafar bolaning masalasi ijobiy hal etildi.
Uy-joyga muhtoj etim bolalar va ota-ona qaramog`idan mahrum bo`lgan 406 nafar bolaning 388 nafariga uy-joylar berildi.
